बुद्ध – सुधीर इंगळे

मिरवणुका
रॅली
बुद्ध मूर्तींची
स्थापना करून
बुद्ध समजून घेता येईल का ?
परित्राण पाठ
ग्रंथांचं पठन
बुद्धाचा जयघोष
बुद्धाला नमन करून
बुद्ध समजून घेता येईल का ?
शुभ्र वस्त्र
बोधिवृक्षांची पानं
पंचशील ध्वज
शीलाचा धागा
भन्तेंना दान देऊन
बुद्ध समजून घेता येईल का ?
बुद्ध मैत्रीत
बुद्ध करुणेत
बुद्ध निसर्ग सृष्टीत
बुद्ध चराचरात
बुद्ध अंतरंगात
बुद्ध प्रज्ञेत
बुद्ध नालंदा
हा बोधिवृक्ष समजून घेता येईल का ?
बुद्ध अहिंसेत
बुद्ध क्षमायाचनेत
बुद्ध शीलात
बुद्ध वैश्‍विक प्रेमात
बुद्ध विज्ञानात
बुद्ध चिकित्सेत
हा मनोशास्त्रज्ञ समजून घेता येईल का ?
बुद्ध सत्यात
बुद्ध समतेत
बुद्ध कृतीत
बुद्ध चित्तात
बुद्ध उत्तर युद्धाचे
जगाला आज बुद्ध समजून घेता येईल का ?
उद्ध्वस्त मनात
करुणेची बीजं पेरणारा बुद्ध
लोकशाही शिकवणारा बुद्ध
कबीराच्या फकिराला
श्रीमंत करणारा बुद्ध
शिवबाच्या स्वराज्याचा अर्थ बुद्ध
तुकारामाच्या गाथेतला विद्रोह बुद्ध
जोतिबाच्या लेखणीत बुद्ध
बाबासाहेबांच्या समग्र जीवनात बुद्ध
जीवनाच्या संघर्षशील
गाण्याला
प्रकाशाचे गीत देणारा बुद्ध
अत्त दीप भवची मास्टर की देणारा
मार्गदाता बुद्ध
भय, भ्रम, मोक्ष, गुलामगिरी, कर्मकांडातून
मुक्त करणारा बुद्ध
बुद्ध स्वातंत्र्य
बुद्ध बंधुत्व
बुद्ध सामाजिक न्याय
बुद्ध निरागस वात्सल्याचं प्रतीक
खरंच,
बुद्ध समजून घेता येईल का ?
बुद्ध समजून सांगता येईल का ?

– सुधीर इंगळे